"Даулайбыз, къуру, кесибиз ючюн..." Ой, анням, мени анням,
Санынг къарыусуз болду,
Кел, башынгы сылайым,
Узатчы бери къолунгу.
Гитчелигим - насыбым,
Юйюнгде ётгенди.
Ызыма бир къайтайым,
Заман а кетгенди...
Кел, тёшеклени джасайыкъ,
Юйюнгю джери бир джумушакъ.
Кюйюзге къарай джукълайыкъ,
Ол заман, насыб заман, болду узакъ..
Ай, Аллах, бери, бери бир къайтар,
Ол къайгъысыз заманны,
Меннге бир джетмесин къадар -
Асыраргъа ол адамны...
Хар къартха дейбиз "къая",
Туруб турлукъча ёмюрледе,
Джелден, суудан да аямай,
Къатыб турур джер юсюнде.
Аллахым, Сен бир кеч мени,
Тарталмайды мени иманым.
Айырмай кюнлени да кечлени -
Термиледи ассы джаным!
Сынауну мыдахлыкъгъа бурдум,
Юсюмден билмегенни билдим,
Ёлюмге къаршчы туруб -
Бир чачылмасын диним!
Намазлыгъынгда барды тамгъа -
Суджутдан.
Нек бермейме анга багъа?
Джутлукъдан...
Тюзюн айтайым:
Джутлугъум иймейди сени,
Сени ючюн джокъду джылауум!
Джангыз къалырды дертим -
Джангызлай къалса джашауум!
Кетген адамгъа иймейбиз джыламукъ,
Джолну барды ахыры, джашауну - учу.
Олду - Аллах салгъан буйрукъ,
Даулайбыз, къуру, кесибиз ючюн...
